Tuesday, March 24, 2020

සුබ පැතුම්..





ඈත් වෙලා දුරකට වෙන් වී ගියෙම
හදාගන්න බැරිවුණ හින්දා තවම...

නුඹ වන් වූ සිතක් මට හමුවූ තැනක
මම හිත හදාගෙන නවතින්නම් මැණික...




Monday, February 29, 2016

නිවී යන්නට පළමුවෙන් සිළ..

Eternal Sunshine of the spotless mind


දුක සතුට මාරුවෙන් මාරුව
ගලාගෙන ගිය ගෙවුණු යුග වල
බොහෝ මිනිසුන් මුණගැසී ඇත
කඳුල සිනහව හදට ලං කල..

අඳුර රජකළ ලොවක ගනඳුර
සහන් එළියක් ලෙසින් දුරුකල
මෙතෙක් කල් මට මුණ ගැසී ඇති
සුන්දරම සිත දකිමි නුඹ තුල..

නිවී යන්නට පළමුවෙන් සිළ
පරව යන්නට කලින් පිපි මල
නතර වෙන්නම් අතර මඟකින්
මතකයන් සමඟින් ඉතිරිකළ..



Image: Eternal Sunshine of the spotless mind 
 

Saturday, October 3, 2015

නුඹ නැතිව මම

කාත් කවුරුත් නැති උනත් ළඟ
සිතින් නුඹ ළඟ ඉන්නවා
සුවඳ තාමත් දැනෙනවා

ඒත් දාහක් සෙනඟ අතරේ
තනිකමක් මට දැනෙනවා
නුඹේ මුහුණම සොයනවා

රෑත් ඇහැරී සිහිනයෙන් මෙන්
නුඹව අතගා සොයනවා
කොහි ගිහින්දැයි සිතෙනවා

ඈත් වී දිගු කලක් හින්දා
යළි නොයේදැයි හිතෙනවා
හිතට මම බොරු කියනවා

Thursday, March 12, 2015

කොතැනක හෝ හිඳ නුඹ සතුටින් සිටියි නම් මම ද සතුටින් වග පමණක් පවසමි.




සියක් ගව් මා දුරින් සිටියත් - තනිය දැනෙනා විට හදේ
ඇවිත් මොහොතක් ළඟ රැඳෙන්නම් - අමතකව නැහැ පියබඳේ

නුවන් අග මුතු කඳුලු සඟවා - සිනාසෙන විට සඳ නුබේ
පවන් රැල්ලක් වෙලා ඇවිදින් - මුහුණ සිපගන්නම් ඔබේ

මාලතී මල් පරව යන මුත් - නැවුම් මලකට ඉඩ හදා
මා හදේ මල් අසුන සිපගත් - කුසුම් සුවඳයි නුඹ සදා

පැතුම් පමණක් ළඟ ඉතුරු කර - ජීවිතේ ගඟ යයි ඇදී
සිතින් නොසැලී ගමන මේ දුර - ගලනු කඳුලට ඉඩ නොදී

හදවතක් ඔය නමින් පෙම් කල - කොතැන හෝ හිඳ තනිවෙලා
ජීවිතේ කල් ගෙවාගනු ඇත - නුඹේ සැනසුම දෙස බලා

Wednesday, August 27, 2014

(හිරි)මල් හීන




දම් පාට නිල් පාට කහ පාට මල් එක්ක
ගං දෑල උඩ පනින මල් හීන මං දැක්ක
නංගියව සිහි වෙන්නෙ රතු ගවුමෙ මල් එක්ක
සංසාරෙ හැමදාම ඇවිදින්නෙ ඈ එක්ක

මොණරගලටත් එහා කේරලේටත් එහා
නිල් අහසටත් එහා මුලු ලෝකෙටම එහා
හිත මිසක කය නොමැති අකනිටාවකි මහා
උඹ ඉන්නෙ මං එක්ක බලාපන් මා දිහා

පාවෙනා හිතේ නුඹෙ සතුට මිස දුක නොමැති
හීනෙනුත් හිනහෙනා ප්‍රීතියේ ඉම නොමැති
ආඩතෝඩා සුවඳ කෙලවරේ බොර දුමැති
විඳගනින් ජීවිතේ මේ තමයි උඹ කැමති

තණ මලක සුවඳ ගෙන විලේ දිය නාන්නට
පණ උනත් පුදන්නම් මලේ සුව විඳින්නට
සිනහවට කැමති නම් හිත පුරා හිනැහෙන්ට
පණ ගැහෙන පපුවකට එයම ඇති සැනසෙන්ට

ජීවිතේ හීනයකි හීනයයි ජීවිතේ
දවාලකි රාත්‍රිය රැයට දහවල සිතේ
ලෝකයම යටිකුරුව පීඩිතව හාමතේ
සහනයක් ලැබගන්න එන්න මේ මාවතේ



කාලයකට ඉස්සරින් ලියපු කවි පෙළක්.. පාළුවට ගිය අඩවිය අලුත් කරන්න හිතුවා..