නුඹ නැතිව මම

කාත් කවුරුත් නැති උනත් ළඟ
සිතින් නුඹ ළඟ ඉන්නවා
සුවඳ තාමත් දැනෙනවා

ඒත් දාහක් සෙනඟ අතරේ
තනිකමක් මට දැනෙනවා
නුඹේ මුහුණම සොයනවා

රෑත් ඇහැරී සිහිනයෙන් මෙන්
නුඹව අතගා සොයනවා
කොහි ගිහින්දැයි සිතෙනවා

ඈත් වී දිගු කලක් හින්දා
යළි නොයේදැයි හිතෙනවා
හිතට මම බොරු කියනවා

කොතැනක හෝ හිඳ නුඹ සතුටින් සිටියි නම් මම ද සතුටින් වග පමණක් පවසමි.

සියක් ගව් මා දුරින් සිටියත් - තනිය දැනෙනා විට හදේ

ඇවිත් මොහොතක් ළඟ රැඳෙන්නම් - අමතකව නැහැ පියබඳේ

නුවන් අග මුතු කඳුලු සඟවා - සිනාසෙන විට සඳ නුබේ

පවන් රැල්ලක් වෙලා ඇවිදින් - මුහුණ සිපගන්නම් ඔබේ

මාලතී මල් පරව යන මුත් - නැවුම් මලකට ඉඩ හදා

මා හදේ මල් අසුන සිපගත් - කුසුම් සුවඳයි නුඹ සදා

පැතුම් පමණක් ළඟ ඉතුරු කර - ජීවිතේ ගඟ යයි ඇදී

සිතින් නොසැලී ගමන මේ දුර - ගලනු කඳුලට ඉඩ නොදී

හදවතක් ඔය නමින් පෙම් කල - කොතැන හෝ හිඳ තනිවෙලා

ජීවිතේ කල් ගෙවාගනු ඇත - නුඹේ සැනසුම දෙස බලා

(හිරි)මල් හීන

දම් පාට නිල් පාට කහ පාට මල් එක්ක
ගං දෑල උඩ පනින මල් හීන මං දැක්ක
නංගියව සිහි වෙන්නෙ රතු ගවුමෙ මල් එක්ක
සංසාරෙ හැමදාම ඇවිදින්නෙ ඈ එක්ක

මොණරගලටත් එහා කේරලේටත් එහා
නිල් අහසටත් එහා මුලු ලෝකෙටම එහා
හිත මිසක කය නොමැති අකනිටාවකි මහා
උඹ ඉන්නෙ මං එක්ක බලාපන් මා දිහා

පාවෙනා හිතේ නුඹෙ සතුට මිස දුක නොමැති
හීනෙනුත් හිනහෙනා ප්‍රීතියේ ඉම නොමැති
ආඩතෝඩා සුවඳ කෙලවරේ බොර දුමැති
විඳගනින් ජීවිතේ මේ තමයි උඹ කැමති

තණ මලක සුවඳ ගෙන විලේ දිය නාන්නට
පණ උනත් පුදන්නම් මලේ සුව විඳින්නට
සිනහවට කැමති නම් හිත පුරා හිනැහෙන්ට
පණ ගැහෙන පපුවකට එයම ඇති සැනසෙන්ට

ජීවිතේ හීනයකි හීනයයි ජීවිතේ
දවාලකි රාත්‍රිය රැයට දහවල සිතේ
ලෝකයම යටිකුරුව පීඩිතව හාමතේ
සහනයක් ලැබගන්න එන්න මේ මාවතේ

කාලයකට ඉස්සරින් ලියපු කවි පෙළක්.. පාළුවට ගිය අඩවිය අලුත් කරන්න හිතුවා..

කිම මට තරු රෑන නැතිදා සඳපාන

රන් හා රස සේම - ළඟ හිඳ පණ සේම
නුඹ දුර ගිය දාම - නැතිවිය සැනසීම
කඳුලින් නෙතු තාම - වැලපෙයි හැමදාම
ඉවසන්නෙද කෝම - නුඹ අහිමිව යෑම

මම ලොව එක් තැනක - නුඹ අද තව තැනක
ළඟ සිටි පෙර දිනෙක - රිදවයි ඒ මතක
ආදර සුදු මැණික - මගෙ ආදර මැණික
ජීවත් විය නොහැක - මොහොතක් ඔබ නොදැක

නිල්මිණි බඳු නයන - සිත සැනසුම් ගේන
නිතරම වගෙ දොඩන - රතදර හස පාන
කිම මට තරු රෑන - නැතිදා සඳපාන
නොපෙනේවා හීන - නොමැතිව සුදු මූණ

එක

අද වගේම ලස්සනට ඉර පායල තිබුණ එකමත් එක දවසක තනි වුන පුංචි කුරුල්ලෙක් දුර අහසෙ ඈතට ඈතට ඉඟිලිලා ගියා. එකපාරටම ආව ලොකු සුළඟකට මැදිවුන මේ කුරුල්ලා ඒ සුළං සැරෙන් බේරෙන්න බැරිව ඈතට විසි වෙලා ගියා. අහිංසකයට උනේ මොකද්ද කියල දැනගන්න කවුරුවත්ම ලඟපාත හිටියෙ නෑ. ඒ කුරුල්ලගෙන් ගැලවිලා ආව පුංචි පිහාටුවක් සුලඟත් එක්කම පාවෙලා ඇවිත් හරියටම නතර උනේ ඇමරිකාවෙ කැලිෆෝනියා ප්‍රාන්තෙ මවුන්ටන් වීව් නුවර ගූගල් සමාගමේ අර්ධ සුපිරි පරිගණකයක් උඩ.

සැල කියන්නෙ ව්‍යාජ කියන එක. මුතු කියන්නෙ මුක්ත හෙවත් වෙන්වුන කියන එක. සැලමුතු සිතුවිලි කියන්නෙ හිතක පහල වෙන අව්‍යාජ සිතුවිලි වලට.

මේ බ්ලොග් අඩවිය අරඹන්නට දිරි දුන්න සිංදුවා. ජෙමා අයියා. ඇතුළු සහෝදර මිතුරු කැලට ස්තුතියි.

මුල්ම පෝස්ට් එක පෙන්නන්න ඇයත් ලඟ හිටියනම් කියල හිතුණා.. අද රෑට කතා කරල කියන්න ඕනෙ :)